පෝයදා රෑ විලාපය

මේ තියෙන්නෙ ඉන්දියාවෙ මහාරාශ්ට්‍ර ප්‍රාන්තයෙ පුනා වල තියෙන ශානිවාර්වාදා බලකොටුව..
හැම පෝය දාකම රෑට
ඉතිහාසයෙන් ඉතිරි වෙච්ච
බිහිසුණු විලාපයක් ඇහෙන
අද්භූත තැනක්..
ශානිවාර්වාදා බලකොටුවෙ හැංගිච්ච කතන්දර ගොඩක් තියනව.
ඒවායින් වැඩියත්ම ප්‍රසිද්ධම දේ තමයි අර විලාපයෙ කතන්දරේ..
මේ බලකොටුව හදල තියෙන්නෙ දහ අට වෙනි ශත වර්ශයෙ..
ඒ කාලෙ මහාරාශ්ට්‍ර ප්‍රාන්තය පාලනය කරල තියෙන්නෙ
නානාසාහෙබ් කියල රජ කෙනෙක්..
මේ මහාරාජාට පුත්තු තුන් දෙනෙක් උන්නලු.
මාධව්රාවෝ, විශ්ව රාවෝ, නාරායන් රාවෝ කියල.
මේ නානාසාහෙබ් රජතුමා යුද්ධයකින් මැරුණට පස්සෙ රජකම අයිති වෙලා තියෙන්නෙ මාධව්රාවෝ කුමාරයට..
ඒත්.. වැඩි කාලයක් යන්න කලින්
මාධව්රාවෝ රජතුමාටත්, විශ්වරාවෝ කුමාරයාටත් දෙන්නටම යුධ බිමේදිම මැරෙන්න සිද්ධ වුනාලු..
ඉතිරි වුනේ නාරායන්රාවෝ කුමාරයා විතරයි.
එතකොට නාරායන්රාවෝ කුමාරයාගෙ වයස අවුරුදු දාසයයි..
රජකම බාර ගන්න තරම් වයසක් නෑ..
ඒ හින්ද මහාරාශ්ට්‍රයෙ පාලනය බාර වෙන්නේ
රගුනාත්රාවෝ ට.. ඒ කියන්නෙ කුමාරයගෙ මාමට..
කුමාරයා නිසි වයසට එනකල්
රාජ්‍ය පාලනයයි කුමාරයගෙ ආරක්ෂාවයි දෙකම බාර වෙන්නෙ රගුනාත්රාවෝට..
ඒත් රගුනාත්රාවෝට මේ රාජ්‍යය ගැන කෑදර කමක් ඇති වෙනව..
ඒ කෑදර කමට පොහොර දාන්නෙ රගුනාත්රාවෝගෙ බිරිද.. ආනන්දිබා..
ආනන්දිබාට උවමනා වෙන්නෙ මහාරාශ්ට්‍රයෙ රැජින වෙන්න..
රාජ්‍ය පාලනයට උපදෙස් දෙන්න ඉන්න ඇමතිවරුන්
මේ මාමයි බෑනයි අතරෙ සීතල යුද්ධයක් අවුලනව..
මාමාගෙ බල තණ්හාව.. නැන්දා රාජ්‍යය ගැන තණ්හාවෙන් ඉන්න එක ගැන කුමාරයට කියල
කුමාරයගෙ හිතේ වෛරය පුරවනව..
කුමාරය වුණත් රාජ්‍යෙය අයිති කාරයනෙ
කුමාරය තමන්ගෙ බල තල පාවිච්චි කරල මාමව හිර කරනව..
කාමර අඩස්සියෙ තියනවා..
මාමා රගුනාත්රාවෝ ගාඩි කියන දඩයම් ගෝත්‍රයක් එක්ක හරි හිතවත්.. ඒ දඩයම් ගෝත්‍රය කුමාරයට එච්චර මනාපයක් නෑ..
මාමා ගාඩි ගෝත්‍රයෙ නායකයට ලියුමක් යවනව..
“නාරායන්රාවෝ කුමාරයාගෙන් මාව බේරගන්න“ කියලා..
ලියුම ගෙනියන පණිවිඩ කාරයට ආනන්දිබා මුණ ගැහෙනව..
පණිවිඩ කාරයට අල්ලසක් දීලා ආනන්දිබා ලියුම වෙනස් කරනව..
“නාරායන් රාවෝ කුමාරයා මරලා මාව බේරගන්න“ කියලා.
හද පායපු දවසක රෑ මැද්දෙ
කුමාරය එයාගෙ කාමරේ නිදාගෙන ඉදල
එක පාරටම නැගිටිනකොට
කුමාරය දකිනව
තමන්ගෙ ඇද වටකරගෙන කවුදෝ මිනිස්සු වගයක්..
කඩු පිහි අතින් අරන්..
ගාඩි ගෝත්‍රයෙ නායකයා එව්ව දරුණු ඝාතකයො තමයි ඒ..
කුමාරයා ඇදෙන් පැනල කෑ ගහගෙන දුවනව..
“අනේ මාමේ මාව බේරගන්න“ කියලා..
මිනීමරුවන්ගෙන් බේරෙන්න කුමාරයා මුලු බලකොටුව වටේම දිව්වත්
මාමාවත් නැන්දාවත් කවුරුවත් කුමාරයව බේරගන්න ආවෙ නැහැ..
මිනීමරුවෝ කුමාරයාව කෑලි වලට කපලා ගගට දැම්මා..
අදටත්
හද පායපු පෝය දාට
ෂානිවාර්වාදා බලකොටුවෙ
උස බිත්ති මැද්දෙ
“අනේ මාමේ මාව බේරගන්න“ කියලා කුමාරයාගෙ විලාපය දෝංකාර දෙනවා..
ඒ නිසා මේ ෂානිවාර්වාදා බලකොටුව
ඉන්දියාවේ තියෙන අද්භූතම තැනක් විදිහට ප්‍රසිද්ධයි.